एउटा सत्य जलिरहेको छ !

एउटा सत्य जलिरहेको छ

आँखा अगाडी, बलिरहेछ

काठहरूको हवन माथि

थुप्रै मृत्युहरू !

हेरिरहेको छु

आफन्तका आँखाका चेपबाट

झर्दै गरेका आँशु

सुक्दै, बेटारिएका ओठहरू

डरले काप्दै छन्, उल्टै अनुहारका त्रास

भाग्न छुटेका पसिनाहरू

बन्द भइसकेको स्वाँसमा

खोज्दै छन् स-साना आशहरू

तर, एक एक गर्दै बिलाउदै छ पञ्चतत्वहरू

सोच्दैछु;

वर्षौँ सिंगो शरिर भित्र थुनिएका हावाहरू

स्वतन्त्र भइ,

आज खुल्ला आकाशमाथि कता उड्दै छ ?

सोच्दैछु;

आँगोका लप्काले डडाएर

खरानी बनाएको शरिरदेखि

डरले उछिट्टिएका झिल्काहरू

कता भाग्न खोज्दैछन् ?

देख्दैछु;

अर्को एउटा सत्य

खरानी वागमतिमा मिसिदैछ,

वग्दैछ पानिसंगै तराइतिर,  

झिल्का,

मेटाएर थुप्रै मान्छेका अस्तित्वहरू

हावामा झुण्डिएर, उक्लिदै छ स्वर्गतिर  

सोच्दैछु;

कुनाको मन्दिरबाट

चुरोटको धुवा उडाउदै

हेर्दै कोहि जलेको पारि चितामा

सोच्दै छु;

एउटा सत्य जलिरहेको छ

आँखै अगाडि

र, थाहा छ

म भित्र छ त्यो सत्य

र जलाउछ मलाइ

त्यसैगरी एक दिन

त्यो मृत्युले

र, अस्तित्व मेटाएर, निराकार बनाउनेछ

यो भु-आकारबाट

थाहापाउदा-पाउदै, किन मान्छेहरू ?

अझैँ, एकपछि अर्को रणभुमि जन्माउदै,

रगतमा शरिरको आकार जोख्दैछ ? 

@ सन्तोष पौडेल - सन्तु