म हारेको मान्छे

पछ्याउँदै, सुकेका आशहरु,

गाउँबाट 'शहर' हिँडेको मान्छे,

'ढुंगो' भइ फ्याकिएको,

'म', टुंगो नलागेको मान्छे

'कटेरो'को गल्लीबाट,

एक मुठ्ठी साँस ओकल्न,

'गाँस' बटुल्न, हिँडेको मान्छे

टुटेका 'ज्ञात'हरु,

पुन: 'फुटाल्न' शहर फिरेको मान्छे,

'अक्षर चिनेका' ज्ञानी बज्रस्वाँठ अन्धाहरुमा

हजुर ! 'म' त गिरेको मान्छे,

'सम्भावना' खोस्रदै,

भर्खरै हिजो, शहर छिरेको मान्छे,

'जीत' खोज्दै शहरमा,
बर्षौ भौतारिएको मान्छे,
सबैको नजरबाट,
अझैँ रीत नपुगेको मान्छे,
किन सोध्छौँ?
पटक-पटक

दुनियाँबाटै
'म हारेको मान्छे'